Allt klárt fyrir kjarnaborun á Landeyjasandi
Allur undirbúningur er nú á lokastigi og allt klárt til að hefja fóðrun og kjarnaborun á rannsóknarholunni EG-02 á Landeyjasandi. Verkefnið er einn af lykilþáttunum í viðamiklum jarðfræðirannsóknum sem munu skerða úr um fýsileika þess að gera jarðgöng á milli lands og Vestmannaeyja.
Vegna hinna sérstöku aðstæðna á Landeyjasandi, þar sem efstu lög jarðvegsins samanstanda af lausum sandi, verður byrjað á því að setja niður um 40 metra langa fóðrun. Hlutverk hennar er að tryggja fyllsta stöðugleika borholunnar áður en haldið verður dýpra niður í fastara berg.
Borað 300 metra niður í jarðlögin
Þegar fóðruninni lýkur verður kjarnaborinn settur í gang, en áætlað er að bora holuna niður á allt að 300 metra dýpi. Markmiðið er að ná upp samfelldum kjarnasýnum sem munu veita vísindamönnum og verkfræðingum nákvæmar upplýsingar um gerð og styrk berglaganna undir sandinum.
Slík gagnaöflun er algjör grundvöllur þess að hægt sé að hanna örugg jarðgöng og meta heildarkostnað verkefnisins.
„Það er tilkomumikið að sjá borinn Karl Prins standa í miðri sandfjörunni með eyjasýnina í bakgrunn.“ segir Haraldur Pálsson framkvæmdastjóri. „Með því að bora niður á 300 metra dýpi fáum við áður óþekkt gögn um jarðlögin á þessu svæði, sem færir okkur nær raunhæfu mati á jarðgöngum til Eyja.“
Reiknað er með að gangaopið verði ofar í landinu en líkt og með kjarnaborunina i Vestmannaeyjum, er talið mikilvægt að ná kjörnum þar sem sleppir landi til að ná sem bestu sýnum á gangaleiðinni.
